"s' gääle Pfluderi-Huus "

Dr Zuber René hett das alte Huus vo sim Vatter im Stedtli völlig neu renoviert und gääl lo striiche. Es hei fascht numme Pfluderi dra gschafft (es isch trotzdäm fertig worde) und es wohne fascht numme Pfluderi drin.

Pfyffer und Tamboure si gääli Pfluderi-Fäger, mit Pfluder-Hoose aa und Bäse uf dr Larve.

Das isch ä Neu-Ufflag vo vor villne Johre. Es isch 1980 gsi, wo d'Pfluderi die Art vo Kostüm scho mol gha hei:

Dr Tambour-Major chunnt als Zuber René dr-här. Dr René wo das gääle Huus hett lo renoviere und süscht dr gueti Geischt vo dä Pfluderi isch.

Während dr Fasnacht isch-er leider grad neume i dr Fremdi und mir vermisse ihn scho. I glaub ä mängi und ä mänge vo eus hett am Umzug gluegt, öb dr René nit doch mit sim alte Fotti-Apperat wie immer uf-em Vorstadtplatz stoht (sälbstverständlich im Kostüm) und verschmitzt-gniessend ä paar Fötteli macht....